بعد تفكير مطول فى حال البلد المايل اللى لا يرضى عدو ولا حبيب..و من واقع خبرتى المحدودة ببواطن امور السياسة الداخلية و الخارجية و كل ما وجد او استجد من انواع السياسة .. اقدر اقول و بالفم المليان انى وجدتها على رأى ارشميدس!!فى الواقع اللى قالو زمان "انا و اخويا على ابن عمى..وانا وابن عمى على الغريب" كانوا على دراية غير طبيعية بالطبيعة المصرية..احنا كمصريين طول ما احنا كويسين بنعض فى بعض و بنيجى على بعض.. مبنتجمعش غير على المصايب و دى حقيقة لا يمكن انكارها..بما اننا كلنا ولاد عم فى بعض فاحنا محتاجين واحد غريب يجى يحط رجله فى البلد عشان نبطل ضرب فى بعض و نضرب فيه..و من هذا المنطلق يا سادة يا كرام اقدر اقول ان البلد دى مش هينصلح حالها الا باحتلال يجيبها الارض.. احتلال يحرق و يفسد و يخرب بدل ما احنا اللى بنحرق و نفسد و نخرب..احتلال يقتل الرجاله و يهتك عرض الستات بدل ما رجالتنا بيقتلوا بعض و يعتدوا على ستاتنا و بناتنا..احتلال يطيح باللى ماسكين البلد عن بكرة ابيهم تمهيدا لأن نطيح احنا بيه و نسترد بلدنا..هتقوللى ترضى البهدلة لأهل بلدك؟ اقولك هى فين البلد يا محترم و هما فين اهلها؟ اكرملهم ميت مرة يموتوا شهدا بايد غريبة بدل ما يموتوا زى كلاب السكك بايدين بعض..اكرملنا ميت مرة نقول البلد باظت واللى بوظها الغريب بدل ما تبقى اتهدت بايدين مصرية على الرؤوس المصرية..الاحتلال يا جماعه خطوة تمهيدية لاستعادة السيطرة على البلد و اصلاح ما افسده السادة الحكام..بداية من كل المؤسسات و المنظومات الموجودة فى البلد..مرورا بالتعليم و الصحة و الاقتصاد..ولحد سيكولوجيا المواطن المصرى نفسه .. المواطن المصرى اللى اتحول لوحش من طول حبسته جوه سجن كبير اسمه الوطن..ولأن ايديه مش طايلة اللى حبسوه فبقى بينتقم من بقية اللى معاه فى نفس الحبس..بقينا بناكل بعض عشان مش طايلين السجانة..اللى حبسونا و عملونا وحوش.. الاحتلال هيرجعلنا انتماءنا للبلد و هيرجع حبها لقلوبنا..فى الواقع الاحتلال هيكون المتنفس الوحيد لكميات الذل و القهر و الغضب اللى اترسبت فينا كلنا..هيبقى الطاقة اللى هنطلع فيها كبتنا و نبدأ بعدها صفحة جديدة بعد ما نكون اتلمينا كلنا و فرتكنا الغريب..ماحنا فى الاول و فى الاخر ولاد عم..واحنا ما شاء الله شعب ابن لذينة و تاريخنا مع اى حد حاول يحتلنا اسود و مهبب على دماغ الاعداء باذن واحد احد..فى النهاية احب اوجه ندائى لأى دوله صديقة يكون صعب عليها حالنا و مترضالناش البهدلة اكتر من كده و تحب تمد ايديها و تساعدنا يبقى كتر الف خيرها لو بعتتلنا جيش يحتلنا و يعلمنا الادب..و يطيح بالنظام و يوحد صفوف الشعب و الاجر و الثواب على الله...
هناك تعليقان (2):
أنا رأي كده برضه :)
رغم أن الكلام شكله هزار و مش منطقى بس هو ده الحل الوحيد فعلا
وجود أحتلال هيعطى شرعيه لمقاومه الفساد ( اللى هو موجود فعلا ) بس عشان الفاسد هو النظام ف مقاومه الفساد فى الوضع الحالى أسمها "خروج على النظام و محاوله لقلب نظام الحكم و زعزعه الأستقرار" :)
لكن فى وجود الأحتلال .. الحكم هيبقى مقلوب والأستقرار متزعزع لوحده .. ف مقاومه الفساد هيبقى أسمها " جهاد ضد الأحتلال"
صباح الأفتراء و البؤس :)
تانى مره تبهرينى برأيك القالش فى موضوع حيوى جدا
Thinking Out of the Box ;)
ihapoof :
لا داعى للتصفيق :)
نورت يا فندم
إرسال تعليق